मिरिक महकुमा अन्तर्गत सौरेनी ग्राम पञ्चायत दुईको सांसद नम्बर 13 बडा कोठी क्षेत्रमा देखा परेको खाने पानीको समस्यालाई समाधान गर्न मिरिक नगरपालिका अध्यक्ष एलबी राईको निर्देशन अनि हिल तृणमूल काङ्ग्रेस युवा जिल्ला संयोजक विकास सुब्बाको सक्रियतामा पानी वितरण गरियो। यस अवसरमा ग्राम पञ्चायत उप प्रधान रविन तामाङ अनि पञ्चायत सदस्य देवीराम राई पनि उपस्थित थिए। उप प्रधान रविन तामाङले बडा कोठी क्षेत्रमा पानीको धेरै अभाव रहेको अनि यहाँ पानीको मुहानहरू सुकेपछि मानिसहरूलाई पानी जोगाड गर्न समस्या भइरहेको बेला मिरिक नगरपालिका अध्यक्ष एलबी राईले पानीको ट्याङ्कर बडा कोठी क्षेत्रमा पठाई दिएपछि स्थानीय मानिसहरूले राहत अनुभव गरेको बताएका छन्। उनले मिरिक नगरपालिका अध्यक्ष एलबी राईले मिरिक नगरपालिकालाई मात्र ध्यान नदिएर समस्या परेका ठाँउहरूमा पनि पानी उपलब्ध गरेर असल कार्य गरिदिएको बताउँदै मिरिक नगरपालिका अध्यक्ष एलबी राई अनि युवा संयोजक विकास सुब्बाप्रति आभार प्रकट गरेका छन्। स्मरण रहोस्, केही महिना अघि घैयाबारी जंगलमा डढेलो लागेको बेला पनि मिरिक नगरपालिका अध्यक्ष एलबी राईले पानी उपलब्ध गराइदिएका थिए।
