सरोज गुरुङ , साेरेङ्ग
हिमाकर्ण-सञ्चरानी एडुकेशनल सोसाइटी थर्पुले 10 औं र 12 औं श्रेणीको बोर्ड परीक्षामा सोरेङ-च्याखुङ समष्टिबाट टप्पर बन्ने विद्यार्थीलाई आज एक कार्यक्रमबिच छात्रवृत्ति प्रदान गरेका छन्। सोरेङ जिल्लाको थर्पु उच्चतर माध्यमिक विद्यालयमा सम्पन्न कार्यक्रममा बाह्रौं श्रेणीको परीक्षामा 91.2 प्रतिशत अंक प्राप्त गरि टप्पर बनेकी समीक्षा प्रधान र दसौं श्रेणीमा 92.6 प्रतिशत अंक प्राप्त गरि टप्पर बनेका थर्पु स्कुलका छात्र प्रितम शर्मालाई हेमाकर्ण-सञ्चरानी एडुकेशनल सोसाइटीले आज छात्रवृत्ति प्रदान गरेको हो। मेधावि विद्यार्थीमा शिक्षालाई लिएर थप अभिप्रेरित गर्न अनि विद्यार्थीबिच सकारात्मक प्रतिस्पर्धा र परिश्रमको भाव सिर्जना गर्न यस सोसाइटीले 2006 देखि नै सोरेङ-च्याखुङ समष्टिबाट बोर्ड परीक्षामा उत्कृष्ट अंक प्राप्त गर्ने विद्यार्थीहरुलाई प्रतिवर्ष छात्रवृत्ति प्रदान गर्दैआएका छन्।
अर्कोतिर यस वर्षदेखि हिमाकर्ण-सञ्चरानी एडुकेशनल सोसाइटी थर्पुले प्रगतिशील कृषक र प्रगतिशील ग्वालालाई पनि सम्मान गर्ने थप कार्यक्रमको थालनी गरेको छ। यसवर्ष प्रगतिशील कृषकको रूपमा लाल बहादुर सुब्बा र प्रगतिशील ग्वालाको रूपमा दिलिप घिमिरेलाई सोसाइटीले सम्मान जनाए। थर्पु स्कुलका कर्मचारी नरेन प्रधान र सुरेखा सुब्बालाई पनि उनीहरूको योगदानको मूल्यांकन गर्दै कार्यक्रममा सम्मान जनाइयो।
उल्लेख्य, हिमाकर्ण-सञ्चरानी एडुकेशनल सोसाइटी थर्पुको स्थापना 2006-मा भएको हो। सोरेङ-च्याखुङ समष्टिका पूर्व विधायक एवं पूर्व शिक्षा मन्त्री आरबी सुब्बा र उनको पारिवारिक सदस्यहरुले आफ्ना दिवंगत पिता हिमाकर्ण सुब्बा र माता सञ्चरानी सुब्बाको पुण्य स्मृतिमा हिमाकर्ण-सञ्चरानी एडुकेशनल सोसाइटीको स्थापना गरी सोरेङ-च्याखुङ समष्टि अन्तर्गत सरकारी विद्यालयबाट बोर्ड परीक्षामा उत्कृष्ट अंक प्राप्त गरेर टप्पर बन्ने विद्यार्थीलाई प्रेरणा स्वरूप छात्रवृत्ति प्रदान गर्दैआएका छन्। यो भन्दा अघि छात्रवृत्ति प्राप्त गरेका विद्यार्थीहरू वर्तमानमा कोही डाक्टर, इन्जिनियर, एमडी, भारतीय सेना र विभिन्न विषय लिएर उच्च शिक्षामा अध्ययनरत् छन्।
कार्यक्रमलाई सम्बोधन गर्ने क्रममा एडुकेशनल सोसाइटीका संस्थापक एवं पूर्वमन्त्री आरबी सुब्बाले विद्यार्थीहरुलाई पढाईमा खुब मेहनत र साथीहरू माझ सकारात्मक प्रतिस्पर्धा गर्नुपर्छ भने। पूर्व शिक्षा मन्त्री सुब्बाले अघि भने, नानीहरुलाई आफ्ना अभिभावकले धेरै नै दु:ख कष्ट गरेर आफ्ना शिक्षा दिलाउने काम गर्छन्। पहिलाको हाम्रो समयमा यस्तो संसाधन र सुबिधा थिएन। धेरै दु:ख थियो। तर अहिले विद्यार्थीहरुलाई पढ्नको निम्ति दु:ख छैन। विभिन्न प्रकारको सुख-सुविधाहरु छ, तकनिकी छ। भौतिक संरचनाहरु राम्रो छ। समयलाई सदुपयोग गरेर पढाईपट्टि पूर्ण ध्यानकेन्द्रित गर्नुपर्छ। मातापिताको सपनालाई सपनालाई साकार पर्न खुब मेहनत पढ्नुपर्छ। शिक्षाविना गाउँ समाज कहिले पनि विकसित र समृद्धि समाज बन्न सक्दैन। भोलिको समाज कस्तो निर्माण गर्ने विद्यार्थीहरुको हातमा छ, पूर्वमन्त्री सुब्बाले विद्यार्थीहरुलाई लक्षित गर्दै यसो भने।
सम्बोधनको क्रममा मुख्य अतिथि सोरेङ जिल्लाका प्रमुख शिक्षा अधिकारी केबी छेत्रीले सोसाइटीको सराहना गर्दै छात्रवृत्ति प्राप्त गर्ने विद्यार्थी र अभिनन्दित व्यक्तहरुलाई बधाई ज्ञापन गरे। विद्यार्थीहरुलाई प्रोत्साहित गर्न यसरी प्रतिवर्ष छात्रवृत्ति प्रदान गर्नाले सिर्जनात्मक समाज निर्माणमा ठूलो मद्दत पुग्ने मन्तव्य जाहेर गर्दै सीइओ छेत्रीले सोसाइटीको सराहना गरेको हो। कार्यक्रममा सोसाइटीबारे बिस्तृत जानकारी थर्पु स्कुलका वरिष्ठ शिक्षक डीके भण्डारीले राखेका थिए।
यहाँ सम्पन्न छात्रवृत्ति वितरण कार्यक्रममा प्रमुख अथिति सोरेङ जिल्लाका मुख्य शिक्षा अधिकारी केबी छेत्री रहेका थिए। वहाँको साथमा स्थानीय जनप्रतिनिधि, सोसाइटीका संस्थापक एवं पूर्व शिक्षा मन्त्री आरबी सुब्बा र पारिवारिक सदस्यगण, संघ-संस्था र नागरिक समाजका प्रतिनिधिगण, शिक्षक-शिक्षिका, आमनागरिक र विद्यार्थीहरुको बाक्लो उपस्थिति थियो।
समाचार साैजन्य : हिमदर्पण
