GTA सभा भित्र पारदर्शिता, उत्तरदायित्व र प्रक्रिया: विनय तामाङज्यु लाई एक स्पष्टिकरण ।
मिति १९ सेप्टेम्बर २०२२, गोर्खाल्याण्ड क्षेत्रीय प्रशासन (GTA) सभाले ११ गोर्खा जातिहरूलाई अनुसूचित जनजाति (ST) को मान्यता दिनुपर्ने सम्बन्धमा पारित गरेको प्रस्ताव बारेमा श्री विनय तामाङज्युले व्यक्त गर्नुभएको विचारहरूको जानकारी प्राप्त भएको छ। उहाँका प्रक्रियागत चिन्ताहरूको सम्मान गर्दै, यस सम्बन्धमा केही महत्त्वपूर्ण पक्षहरू स्पष्ट पार्नु आवश्यक देखिएको छ।
दार्जिलिङ बिधानसभा क्षेत्रका निर्वाचित विधायक (MLA) भएको नाताले म GTA सभाको पदेन (ex-officio) सदस्य हुँ, जुन गोर्खाल्याण्ड क्षेत्रीय प्रशासन ऐन, २०११ को अध्याय १, धारा ५, उपधारा (३) अन्तर्गत स्पष्ट रूपमा उल्लेख छ। यस कानुनी व्यवस्थाअनुसार, GTA सभाका बैठकहरूबारे औपचारिक जानकारी प्राप्त गर्ने तथा सभामा पारित प्रस्तावहरूको प्रतिलिपि पाउने मेरो वैधानिक अधिकार हो। तर, सम्बन्धित प्रशासनिक अधिकारीहरूले यो अनिवार्य कर्तव्य पूरा गरेका छैनन्, जसका कारण मलाई यी महत्त्वपूर्ण प्रस्तावहरूको जानकारी आधिकारिक रूपमा उपलब्ध गराइएको छैन।
यदि प्रशासनिक प्रक्रियाहरू विधिसम्मत रूपमा पालना गरिएको भए, मलाई GTA का प्रमुख कार्यकारी (Chief Executive) समक्ष उक्त प्रस्तावको वर्तमान स्थिति बारे औपचारिक जानकारी माग्नुपर्ने अवस्था आउने थिएन। विडम्बनापूर्ण कुरा त के छ भने, कतिपय व्यक्तिहरू प्रक्रियागत शुद्धताको उपदेश दिन अग्रसर हुन्छन्, तर जब विधिसम्मत रूपमा GTA सभाका निर्णयहरूको जानकारी उपलब्ध गराउने विषय आउँछ, त्यहाँ मौनता अपनाइन्छ।
त्यसैले, म स्पष्ट रूपमा भन्न चाहन्छु कि प्रस्ताव पारित गर्नु मात्रै पर्याप्त हुँदैन; त्यसको कार्यान्वयन, निरन्तर अनुगमन तथा राज्य र केन्द्र सरकारसँगको समन्वय अझै महत्त्वपूर्ण पक्षहरू हुन्। यदि १९ सेप्टेम्बर २०२२ मा GTA सभाले पारित गरेका प्रस्तावहरू सम्बन्धित निकायहरूमा पठाइसकिएको छ भने, त्यसको आधिकारिक पुष्टि कहाँ छ? यदि पठाइएको छैन भने, यसको जिम्मेवारी कसको हो? यी प्रश्नहरू टार्न मिल्ने होइन, स्पष्ट जवाफ आवश्यक छ। त्यसैले, प्रक्रियागत औपचारिकता माथि राजनीतिक खेल खेल्नुको सट्टा, म श्री विनय तामाङज्यु तथा अन्य सरोकारवाला पक्षहरूलाई अपील गर्दछु कि जनताको मागहरूलाई प्रभावकारी रूपमा अघि बढाउनुहोस्, न कि तिनलाई प्रशासनिक लापरवाही वा मनोगत ढिलाइको चक्करमा अल्झाउने।
म पारदर्शिता, उत्तरदायित्व र जनताको हकहितको पैरवी गर्न प्रतिबद्ध छु, र यही प्रतिबद्धता हाम्रा क्षेत्रीय प्रशासनिक निकायहरूबाट पनि अपेक्षा गर्दछु।
निरज जिम्बा तामाङ
विधायक, दार्जिलिङ बिधान सभा क्षेत्र ।
