पाक्योङ जिल्लाको तारेथाङ क्षेत्रमा मातृशोकमा परेर अभिभावकविहीन अवस्थामा रहेका दुई दिदीबहिनीको विषय सार्वजनिक भएपछि राज्य सरकारको ध्यानाकर्षण भएको छ। गत १८ अगस्ट २०२६ मा न्यूज प्रतिबिम्बले ती दुई बालिकाको दयनीय अवस्थाबारे भिडियो समाचार प्रसारण गरेको थियो। उक्त समाचार सार्वजनिक भएसँगै विभिन्न क्षेत्रबाट चासो व्यक्त हुन थालेको थियो।
यसै सन्दर्भमा आज मुख्यमन्त्री कार्यालयका प्रतिनिधि तथा सम्बन्धित अधिकारीहरू तारेथाङ पुगेर पीडित दुई दिदीबहिनीको अवस्थाबारे प्रत्यक्ष जानकारी लिएका छन्। अधिकारीहरूले बालिकाहरू बसोबास गरिरहेको स्थानको अवलोकन गर्नुका साथै उनीहरूको दैनिक जीवनयापन, शिक्षा, स्वास्थ्य तथा अन्य आवश्यक पक्षबारे जानकारी संकलन गरेका थिए।
स्थलगत निरीक्षणका क्रममा मुख्यमन्त्री कार्यालयका अधिकारीहरूले बालिकाहरूको अवस्थालाई गम्भीरतापूर्वक सङ्ज्ञानमा लिएको बताउँदै सरकारको तर्फबाट आवश्यक सहयोग उपलब्ध गराउन पहल गरिने आश्वासन दिएका छन्। उनीहरूको शिक्षा, संरक्षण तथा आधारभूत आवश्यकताहरू सुनिश्चित गर्न सम्बन्धित निकायहरूसँग समन्वय गरी आवश्यक प्रक्रिया अघि बढाइने जानकारी पनि दिइएको छ।
स्थानीयवासीहरूले न्यूज प्रतिबिम्बद्वारा विषयलाई सार्वजनिक रूपमा उठान गरिएपछि सरकारको ध्यान पुग्न सकेको भन्दै सकारात्मक प्रतिक्रिया व्यक्त गरेका छन्। उनीहरूले बालिकाहरूको दीर्घकालीन हितका लागि सरकारी तथा सामाजिक स्तरबाट निरन्तर सहयोग आवश्यक रहेको बताएका छन्।
पीडित दुई दिदीबहिनीको जीवनमा केही राहत पुग्ने आशा जागेको भन्दै स्थानीय समुदायले सरकारलाई आवश्यक सहयोग शीघ्र उपलब्ध गराउन आग्रह गरेका छन्। समाचारमार्फत उजागर भएको यो घटनाले कठिन परिस्थितिमा रहेका बालबालिकाको संरक्षण र सहयोगका लागि राज्य तथा समाजको संयुक्त जिम्मेवारीलाई पुनः स्मरण गराएको छ।
